நீங்கள் தேடியது "இந்தியா கிரிக்கெட்"

டோனி டெஸ்ட் கிரிக்கெட்டில் இருந்து ஓய்வு பெற்றதும் கொல்கத்தாவைச் சேர்ந்த விருத்திமான் சகா விக்கெட் கீப்பராக செயல்பட்டு வந்தார். சிறப்பாக விக்கெட் கீப்பர் பணியை செய்ததுடன் ரன்களும் குவித்தார். இதனால் நீண்ட நாட்களாக சகா டெஸ்ட் அணியில் விளையாடுவார் என்று எதிர்பார்க்கப்பட்டது.

ஆனால் தென்ஆப்பிரிக்கா தொடரின்போது அவருக்கு காயம் ஏற்பட்டது. இதனால் இங்கிலாந்து தொடரின்போது தினேஷ் கார்த்திக் விக்கெட் கீப்பராக செயல்பட்டார். ஆனால், இங்கிலாந்து தொடரில் சிறப்பாக விளையாடவில்லை. இதனால் ரிஷப் பந்த் அணியில் இடம்பிடித்தார்.

தனக்கு கிடைத்த வாய்ப்பை ரிஷப் பந்த் கெட்டியாக பிடித்துக் கொண்டார். இதற்கிடையே தோள்பட்டை காயத்தால் சுமார் 8 மாதமாக சகாவால் விளையாட முடியாமல் போனது. தற்போது காயம் குணமடைந்து இந்தியாவின் உள்ளூர் டி20 கிரிக்கெட்டான சையத் முஸ்தாக் அலி தொடரில் விளையாட இருக்கிறார்.

எனது இடத்தை கெட்டியாக பிடித்துக் கொண்ட ரிஷப் பந்த்-ஐ நான் போட்டியாளராக கருதவில்லை என்று தெரிவித்துள்ளார். இதுகுறித்து சகா கூறுகையில் ‘‘நான் காயத்தால் விளையாடாமல் இருந்த நிலையில் என்னுடைய இடத்தை ரிஷப் பந்த் கெட்டியாக பிடித்துக் கொண்டார். யாராக இருந்தாலும் அவர்களது வாய்ப்பை கெட்டியாக பிடிக்க நினைப்பார்கள். அதைத்தான் ரிஷப் பந்த் செய்துள்ளார்.

நான் ரிஷப் பந்த்-ஐ போட்டியாளராக கருதவில்லை. நான் தேசிய கிரிக்கெட் அகாடமிக்கு சென்றிருந்த போது ரிஷப் பந்த் உடன் நீண்ட நேரம் உரையாடினேன். அப்போது நாங்கள் ஆட்டத்திறன் மற்றும் தேர்வு குறித்து பேசினோம்’’ என்றார்.

ஆஸ்திரேலிய கிரிக்கெட் அணி இந்தியாவில் சுற்றுப் பயணம் செய்து இரண்டு 20 ஓவர் போட்டி மற்றும் 5 ஒரு நாள் போட்டிகளில் விளையாடுகிறது. 20 ஓவர் தொடர் 24-ந்தேதியும், ஒரு நாள் தொடர் மார்ச் 2-ந்தேதியும் தொடங்குகிறது.

உலகக் கோப்பை போட்டிக்கு முன்பு இந்திய அணி விளையாடும் கடைசி ஒரு நாள் தொடர் என்பதால் ஆஸ்திரேலிய தொடர் மிகுந்த எதிர்பார்ப்புக்கு உள்ளாகி இருக்கிறது.

இந்த தொடருக்கான இந்திய அணியில் இருந்து தமிழக வீரர் தினேஷ் கார்த்திக் நீக்கப்பட்டுள்ளார். 20 ஓவர் போட்டியில் இடம்பெற்ற அவர் ஒரு நாள் போட்டியில் இருந்து கழற்றி விடப்பட்டுள்ளார். கடந்த 2 ஆண்டுகளாக ஒரு நாள் போட்டியில் நிலையாக விளையாடி வரும் அவர் நீக்கப்பட்டது அதிர்ச்சியான ஒன்றே.

ஆஸ்திரேலிய தொடரில் நீக்கப்பட்டதால் அவர் உலகக் கோப்பை அணியிலும் இடம் பெறுவதற்கான வாய்ப்பு குறைவே.

இந்த நிலையில் உலக கோப்பை அணியில் தினேஷ் கார்த்திக் தேவை என்று முன்னாள் கேப்டனும், டெலிவி‌ஷன் வர்ணனையாளருமான கவாஸ்கர் தெரிவித்துள்ளார். இது தொடர்பாக அவர் கூறியதாவது:-

இந்திய அணியின் தொடக்க ஆட்டக்காரராக லோகேஷ் ராகுல், ரகானே, ரி‌ஷப் பந்த் என யாரையும் களம் இறக்க தேவையில்லை. தினேஷ் கார்த்திக்கை களம் இறக்கலாம். இங்கிலாந்தில் நடைபெறும் உலக கோப்பையில் பங்கேற்கும் இந்திய அணி வீரர்கள் குறித்து எனக்கு ஒரு கண்ணோட்டம் இருக்கிறது.

என்னுடைய கணிப்பில் 13 வீரர்களுக்கு நிச்சயம் இடம் கிடைக்கும். அதில் தவான், ரோகித் சர்மா, விராட் கோலி, அம்பதி ராயுடு, டோனி, கேதர் ஜாதவ், ஹர்த்திக் பாண்டியா, புவனேஸ்வர் குமார், சாஹல், பும்ரா, முகமது‌ ஷமி, குல்தீப் யாதவ் ஆகியோருக்கு வாய்ப்பு உண்டு.

மற்ற வகையில் ராகுல், ரகானே, ரி‌ஷப் பந்ட் ஆகியோரை காட்டிலும் உலகக் கோப்பைக்கு தினேஷ் கார்த்திக் தேவை. அணியில் எப்போதும் நெகிழ்வு தன்மை இருக்க வேண்டும். தொடக்க வீரராக தினேஷ் கார்த்திக்கை மாற்றி களம் இறக்கும்போது நல்ல முடிவு கிடைக்கும். டெஸ்ட் போட்டியில் களம் இறங்கிய அனுபவம் இருப்பதால் அவரால் ஒரு நாள் போட்டியில் ஜொலிக்க முடியும்.

14-வது வீரராக விஜய் சங்கர் இருக்கலாம். ஏனென்றால் இங்கிலாந்து மைதானத்தில் பந்து நன்றாக ‘சுவிங்’ ஆகும். அப்போது ஹர்த்திக் பாண்டியா, விஜய் சங்கர் ஆகிய இரண்டு ஆல் ரவுண்டர்களுடன் களம் இறங்கலாம்.

கலீல் அகமது, முகமது சிராஜ் ஆகியோர் எதிர்பார்த்த அளவுக்கு பந்து வீசவில்லை. உமேஷ் யாதவை மாற்று வீரராக மட்டுமே வைத்து இருக்கலாம். ஆஸ்திரேலியாவுக்கு எதிரான ஒரு நாள் தொடரை இந்தியா 5-0 என்ற கணக்கில் வெல்லும் என்று நம்புகிறேன்.

இவ்வாறு கவாஸ்கர் கூறியுள்ளார்.

தினேஷ் கார்த்திக் நிலை குறித்து முன்னாள் வீரரும், டெலிவி‌ஷன் வர்ணனையாளருமான சஞ்சய் மஞ்ரேக்கர் கூறியதாவது:-

இந்திய அணி நிர்வாகம் தினேஷ் கார்த்திக்கை 20 ஓவர் வீரராக மட்டுமே பார்க்க தொடங்கி விட்டது என்பது புரிந்துவிட்டது. அவருக்கு உலகக் கோப்பைக்கான இந்திய அணியில் இடம் கிடைப்பதும், வாய்ப்புக்கான கதவுகள் திறப்பதும் என்னை பொறுத்தவரை இல்லை. அதற்காக அவரின் ரசிகர்களிடம் வருத்தத்தை தெரிவிக்கிறேன்.

நியூசிலாந்தில் அம்பதி ராயுடு பொறுமையாக, நிதானமாக ஆடிய விதம் கார்த்திக்கை விட சிறப்பாக இருந்தது என்று நிர்வாகம் கருதலாம். நீண்ட நேரம் விளையாடும் போட்டியில் தினேஷ் கார்த்திக் நிலைத்து ஆடும் பொறுமையில்லை என்று கருதுகிறார்கள்.

டோனி, ரிசப் பந்த் ஆகியோருடன் ஒப்பிடுகையில் தினேஷ் கார்த்திக், டோனியை காட்டிலும் கீப்பிங்கில் சற்று குறைவாகவும், ரி‌ஷப் பந்த்-ஐ காட்டிலும் சற்று சிறப்பாகவும் செயல்படுகிறார்.

ஆனால் ரி‌ஷப் பந்த் சமீப காலமாக பேட்டிங் செய்யும் விதம் தேர்வாளர்களை கவர்ந்துள்ளது. நம்பிக்கை அளித்துள்ளது. நான் ரி‌ஷப் பந்த் ஆதரவாளர் இல்லை. ஆனால் அவர் ஒரு நாள் போட்டியில் தனக்கான இடத்தை தக்க வைக்க முயன்று வருகிறார்.

பல போட்டிகளில் தனக்கு கிடைத்த வாய்ப்பை தினேஷ் கார்த்திக் சரியாக பயன்படுத்தியும் தேர்வு செய்யவில்லை எனும்போது அவரது ஒரு நாள் கிரிக்கெட் வாழ்க்கை ஏறக்குறைய முடிந்துவிட்டது என்றே கருதுகிறேன். 20 ஓவர் வீரராக மட்டுமே அவர் தொடர முடியும் என்று கிரிக்கெட் வாரியம் விரும்புகிறது.

இவ்வாறு சஞ்சய் மஞ்ரேக்கர் கூறினார்.

நியூசிலாந்து - இந்தியா இடையிலான 3-வது மற்றும் கடைசி டி20 கிரிக்கெட் போட்டி ஹாமில்டனில் நேற்று நடைபெற்றது. முதலில் பேட்டிங் செய்த நியூசிலாந்து 4 விக்கெட் இழப்பிற்கு 212 ரன்கள் குவித்தது. பின்னர் 213 ரன்கள் அடித்தால் வெற்றி என்ற இலக்குடன் இந்தியா களம் இறங்கியது. இந்தியா சிறப்பான ஆட்டத்தை வெளிப்படுத்தினாலும், 208 ரன்கள் மட்டுமே அடித்து 4 ரன்னில் தோல்வியைத் தழுவியது.

இந்தத் தோல்வியின் மூலம் இந்தியா மூன்று போட்டிகள் கொண்ட தொடரை 1-2 என இழந்தது. இதன்மூலம் மூன்று போட்டிகள் கொண்ட இருதரப்பபு டி20 கிரிக்கெட்டில் இந்தியாவின் சாதனை முடிவிற்கு வந்தது.

இதற்கு முன் இந்தியா 9 இருதரப்பு டி20 கிரிக்கெட் தொடரில் தோல்வியை சந்திக்காமல் தொடர் வெற்றியை ருசித்து வந்தது. நியூசிலாந்து மிகக்குறைவான ரன்னில் வெற்றி பெறுவது இது நான்காவது முறையாகும்.

இந்தியாவிற்கு எதிராக நியூசிலாந்தின் 2-வது மிகக்குறைந்த ரன் வெற்றி இதுவாகும். கடந்த 2010-ல் பாகிஸ்தானுக்கு எதிராக 1 ரன் வித்தியாசத்திலும், 2012-ல் இந்தியாவிற்கு எதிராக 1 ரன்னிலும், 2009-ல் இலங்கைக்கு எதிராக 3 ரன்னிலும் வெற்றிப் பெற்றிருந்தது.

இந்த தோல்வியில் மூலம் இந்தியா நியூசிலாந்துக்கு எதிராக 8 போட்டியில் தோல்வியை சந்தித்துள்ளது. எந்தவொரு அணிக்கெதிராகவும் இந்தியா இந்த எண்ணிக்கையில் தோல்வியை சந்தித்ததில்லை.

குருணால் பாண்டியா 54 ரன்கள் விட்டுக்கொடுத்தார். இதன்மூலம் அதிக ரன்கள் விட்டுக்கொடுத்தவர்கள் பட்டியலில் 3-வது இடம் பிடித்துள்ளார்.

கொலின் முன்ரோ டி20 கிரிக்கெட்டில் 92 சிக்சர்கள் விளாசி, சர்வதேச அளிவில் 4-வது இடத்தையும், நியூசிலாந்தின் முதல் வீரர் என்ற பெருமையும் பெற்றுள்ளார்.

நேற்றைய போட்டியின் மூலம் எம்எஸ் டோனி 300-வது டி20 கிரிக்கெட் போட்டியில் அடியெடுத்து வைத்தார். இதன்மூலம் 300 போட்டிகளில் விளையாடிய முதல் வீரர் என்ற பெருமையை பெற்றுள்ளார். ரோகித் சர்மா 298 போட்டிகளிலும், சுரேஷ் ரெய்னா 296 போட்டிகளிலும் விளையாடியுள்ளனர்.

இந்திய ஒருநாள் கிரிக்கெட் அணி ஆஸ்திரேலியாவிற்கு எதிரான தொடரை 2-1 எனவும், நியூசிலாந்துக்கு எதிரான தொடரை 4-1 எனவும் கைப்பற்றியது. இதனால் ஐசிசி ஒருநாள் கிரிக்கெட் தரவரிசையில் 122 புள்ளிகள் பெற்று 2-வது இடத்திற்கு முன்னேறியுள்ளது.

இங்கிலாந்து 126 புள்ளிகளுடன் முதல் இடத்தில உள்ளது. தென்ஆப்பிரிக்கா, நியூசிலாந்து அணிகள் தலா 111 புள்ளிகள் பெற்று முறையே 3 மற்றும் 4-வது இடத்தைப் பிடித்துள்ளன. பாகிஸ்தான் 102 புள்ளிகளுடன் ஐந்தாவது இடத்தில் உள்ளது. ஆஸ்திரேலியா 100 புள்ளிகளுடன 6-வது இடத்தில் உள்ளது.



பேட்ஸ்மேன் தரவரிசையில் விராட் கோலி 887 புள்ளிகளுடன் தொடர்ந்து முதலிடம் வகிக்கிறார். ரோகித் சர்மா 854 புள்ளிகளுடன் 2-வது இடத்தில் உள்ளார். பந்து வீச்சாளர்களுக்கான தரவரிசையில் பும்ரா 808 புள்ளிகளுடன் முதல் இடத்தில் உள்ளார். டிரென்ட் போல்ட் 3-வது இடத்திற்கு முன்னேறியுள்ளார். குல்தீப் யாதவ் 4-வது இடத்திற்கு பின்தங்கினார்.

நியூசிலாந்து - இந்தியா இடையிலான நான்காவது ஒருநாள் கிரிக்கெட் போட்டி இன்று ஹாமில்டனில் நடைபெற்றது. டாஸ் வென்ற நியூசிலாந்து பந்து வீச்சை தேர்வு செய்தது.

இந்தியா முதலில் பேட்டிங் செய்தது. ஆடுகளம் ஸ்விங் பந்து வீச்சுக்கு அதிக அளவில் ஒத்துழைத்தது. இதனால் இடது கை வேகப்பந்து வீச்சாளரான டிரென்ட் போல்ட் இந்திய பேட்ஸ்மேன்களை அச்சுறுத்தினார். ரோகித் சர்மா (7), ஷிகர் தவான் (13), ஷுப்மான் கில் (9), கேதர் ஜாதவ் (1), ஹர்திக் பாண்டியா (16) ஆகியோரை வீழ்த்த இந்தியா 30.5 ஓவர்கள் மட்டுமே தாக்குப்பிடித்து 92 ரன்னில் சுருண்டது.

பின்னர் 93 ரன்கள் அடித்தால் வெற்றி என்ற எளிதான இலக்குடன் களம் இறங்கிய நியூசிலாந்து 14.4 ஓவரில் 2 விக்கெட் இழப்பிற்கு 94 ரன்கள் எடுத்து 8 விக்கெட் வித்தியாசத்தில் வெற்றி பெற்றது.

தோல்வியடைந்தது குறித்து இந்திய அணி கேப்டன் ரோகித் சர்மா கூறுகையில் ‘‘மிக மிக நீண்ட நாட்களுக்குப் பிறகு எங்களுடைய மோசமான பேட்டிங்கில் இதுவும் ஒன்று. இதை நாங்கள் எதிர்பார்க்கவில்லை. நியூசிலாந்து பந்து வீச்சாளர்களை நாம் பாராட்டியாக வேண்டும். இது அவர்களின் அற்புதமான முயற்சி.

இந்தத் தோல்வியில் நாங்கள் சில விஷயங்களை கற்றுக் கொள்ள வேண்டும், அதேநேரத்தில் பந்து ஸ்விங் ஆகும்போது எப்படி பேட்டிங் செய்ய வேண்டும் என்பதை தெரிந்து கொள்வது அவசியம். இந்திய வீரர்கள் ஒவ்வொருவரும் அவரவர்களை கடிந்து கொள்வது அவசியம். இந்த நேரத்தில் சிறந்ததை பற்றி நினைக்க வேண்டும். அதை அவர்கள் வெளிப்படுத்த வேண்டும். நீங்கள் ஒருமுறை அதை பெற்றுவிட்டால், அது உங்களை எளிதாக்கிவிடும்.

நாங்கள் சில மோசமான ஷாட்டுகள் அடித்து ஆட்டமிழந்து விட்டோம். பந்து ஸ்விங் ஆகும்போது எப்போதுமே சவால்தான். ஒருநாள் போட்டியில் ஏராளமான தொடர்களில் நாங்கள் அதிக அளவு ரன்கள் குவித்துள்ளோம். எங்கு தவறு செய்தோம் என்பது ஒவ்வொருவருக்கும் தெரியும். பந்து ஸ்விங் ஆனால், சற்று நேரம் கிடைக்கும். அதற்குள் பந்தை எவ்வாறு எதிர்கொள்வது என்பதை சிந்திக்க வேண்டும்.

நாட்டிற்காக விளையாடும்போது சிறந்த ஆட்டத்தை வெளிப்படுத்த முயற்சி செய்ய வேண்டும். சிறந்த அணி எல்லா விதத்திலும் சிறப்பாக விளையாட வேண்டும். இன்று நாங்கள் அனைத்துத் துறையிலும் சரியாக செயல்படவில்லை’’ என்றார்.

50 ஓவர் உலகக்கோப்பை கிரிக்கெட் தொடர் வருகிற மே மாதம் 30-ந்தேதி இங்கிலாந்தில் தொடங்குகிறது. இதில் 10 அணிகள் சாம்பியன் கோப்பைக்காக பலப்பரீட்சை நடத்துகின்றன.

இத்தொடருக்கு முன் ஒவ்வொரு அணிகளும் தலா இரண்டு போட்டிகள் கொண்ட பயிற்சி ஆட்டத்தில் மோத இருக்கின்றன. இதற்கான போட்டி அட்டவணை இன்று வெளியிடப்பட்டுள்ளது.

அதன்படி இந்தியா மே 25-ந்தேதி நியூசிலாந்துடனும், மே 28-ந்தேதி வங்காள தேசத்துடன் பலப்பரீட்சை நடத்துகின்றன. இங்கிலாந்து பாகிஸ்தான், இலங்கையுடனும், ஆஸ்திரேலியா ஆப்கானிஸ்தான், நியூசிலாந்துடனும், வெஸ்ட் இண்டீஸ் தென்ஆப்பிரிக்கா, நியூசிலாந்துடனும், தென்ஆப்பிரிக்கா இலங்கை, வெஸ்ட் இண்டீஸ் உடனும் பலப்பரீட்சை நடத்துகின்றன.

இந்திய அணி கடந்த ஓராண்டாக வெளிநாட்டில் விளையாடி வருகிறது. தென்ஆப்பிரிக்கா, ஆஸ்திரேலியா, நியூசிலாந்து நாடுகளில் இந்திய அணி ஒருநாள் கிரிக்கெட் தொடரை கைப்பற்றி அசத்தியுள்ளது. இங்கிலாந்தில் மட்டுமே மூன்று போட்டிகள் கொண்ட தொடரை 1-2 என இழந்தது.

முன்னணி வீரர்களான தவான், ரோகித் சர்மா, விராட் கோலி, குல்தீப் யாதவ், சாஹல், புவனேஸ்வர் குமார், முகமது ஷமி, பும்ரா ஆகியோர் சிறப்பான ஆட்டத்தை வெளிப்படுத்தி வருகிறார்கள். உலகக்கோப்பைக்கு முன் இந்திய அணி இன்னும் 7 போட்டிகளில் மட்டுமே விளையாட இருக்கிறது.

இந்நிலையில் ரிசர்வ் வீரர்களுக்கு போதுமான வாய்ப்பு வழங்கப்பட வேண்டும் என்று இந்திய அணியின் பீல்டிங் பயிற்சியாளரான ஆர் ஸ்ரீதர் தெரிவித்துள்ளார்.

இதுகுறித்து ஆர் ஸ்ரீதர் கூறுகையில் ‘‘தொடர்ச்சியாக அணி வெற்றி பெறுவதை எல்லோரும் விரும்புவார்கள். வெற்றிப் பயணத்தில் இருந்து பின்வாங்க யாரும் விரும்பமாட்டார்கள். ஆனால், உலகக்கோப்பைக்கு முன் ஏழு போட்டிகள் மட்டுமே உள்ளதால் ரிசர்வ் வீரர்களுக்கு வாய்ப்பு வழங்குவது அவசியமாகும்.

முன்னணி வீரர்கள் விளையாடி கொண்டிருக்கும் நிலையில், ரிசர்வ் வீரர்களுக்கு போதுமான அளவு நேரம் கொடுக்காத நிலையில் முக்கியமான உலகக்கோப்பை தொடரில் அவர்களை விளையாட வைக்கும் சூழ்நிலை இருக்கக்கூடாது. இதைப்பற்றி அணி நிர்வாகம் சிந்திக்கும் என்பதை நான் உறுதியாக கூறுகிறேன்.

இங்கிலாந்தில் ஜூன் மாதம் நிலவும் வானிலைக்கு நிகரான இடம் நியூசிலாந்தைவிட வேறேதும் இருக்க முடியாது. அதனால் ரிசர்வ் வீரர்களுக்கு இங்கே வாய்ப்பு வழங்கி சிறப்பாக நிலையை உருவாக்க முயற்சி செய்வோம்’’ என்றார்.

இந்திய கிரிக்கெட் அணி ஆஸ்திரேலியாவில் சுற்றுப் பயணம் செய்து மூன்று வகை கிரிக்கெட் தொடரில் விளையாடியது. முதலில் நடைபெற்ற டி20 தொடர் 1-1 என சமநிலையில் முடிந்தது.

அதன்பின் நடந்த டெஸ்ட் தொடரை 2-1 எனக்கைப்பற்றி வரலாற்று சாதனைப் படைத்தது. சமீபத்தில் முடிவடைந்த ஒருநாள் தொடரை 2-1 என கைப்பற்றி தொடரை வெற்றிகரமாக முடித்தது.

இந்திய அணி சாதனைப் படைத்ததால் வீரர்கள் மற்றும் பயிற்சியாளர்களுக்கு பிசிசிஐ பரிசுத் தொகை வழங்கியது. இந்நிலையில் சிறந்த அணிகளை தேர்வு செய்ததற்காக ஐந்து பேர் கொண்ட தேர்வுக் குழுவினருக்கும் தலா 20 லட்சம் ரூபாய் வழங்கப்படும் என்று பிசிசிஐ அறிவித்துள்ளது.

இந்திய கிரிக்கெட் அணியின் முன்னணி வீரர்களான ஹர்திக் பாண்டியா மற்றும் கேஎல் ராகுல் ஆகியோர் ‘காபி வித் கரண்’ என்ற நிகழ்ச்சியில் கலந்து கொண்டர். அப்போது பெண்கள் குறித்து சர்ச்சைக்குரிய வகையில் பேசியதாக குற்றச்சாட்டு எழுந்தது.

இதனால் இருவரும் ஆஸ்திரேலியாவில் இருந்து உடனடியாக நாடு திரும்பினார்கள். ஆனால், இருவர் மீதான விசாரணை இன்னும் தொடங்கவில்லை.

இந்நிலையில் பிசிசிஐ-யின் பொறுப்பு தலைவரான சிகே கண்ணா இருவருக்கும் ஆதரவாக பேசியுள்ளார். இதுகுறித்து சிகே கண்ணா கூறுகையில் ‘‘அவர்கள் தவறு செய்து விட்டார்கள். அவர்களை நாம் ஏற்கனவே சஸ்பெண்ட் செய்துள்ளோம். இதனால் ஆஸ்திரேலியாவில் இருந்து உடனடியாக திருப்பி அனுப்பப்பட்டனர். தவறுக்காக எந்தவித நிபந்தனையின்றி மன்னிப்பு கேட்டுள்ளனர். அவர்களுடைய கேரியர்ஸ்-க்கு தடை போடக்கூடாது’’ என்றார்.

பாகிஸ்தான் கிரிக்கெட் அணி முன்னாள் கேப்டனும், வேகப்பந்து வீச்சாளருமான வாசிம் அக்ரம் அளித்த பேட்டியில் கூறியிருப்பதாவது:-

தற்போதுள்ள சர்வதேச கிரிக்கெட்டில் இந்திய வேகப்பந்து வீச்சாளர் பும்ரா யார்க்கர் வீசுவதில் சிறப்பாக உள்ளார். இந்த ஆண்டு நடைபெறும் 50 ஓவர் உலகக்கோப்பை போட்டியில் பும்ரா கடைசி கட்ட பந்துவீச்சில் பெரிய வித்தியாசத்தையும், தாக்கத்தையும் நிச்சயம் ஏற்படுத்துவார்.

அவர் மற்ற வேகப்பந்து வீச்சாளர்களிடம் இருந்து வித்தியாசமான ஆக்சனுடன் பந்து வீசுகிறார். பும்ராவின் சிறப்பே அவர் சாதாரணமாக யார்க்கர்களை வீசும் திறமை பெற்று இருப்பதுதான். வக்கார் யூனிஸ்போல் ஒருநாள் போட்டி மற்றும் டெஸ்ட் போட்டியிலும் யார்க்கர் பந்து வீசுகிறார்.



ஆஸ்திரேலிய மண்ணில் இந்தியா டெஸ்ட் தொடரை வென்றது மிகப்பெரிய சாதனையாகும். பலவீனமான ஆஸ்திரேலிய அணியை பற்றி நான் விவாதிக்க விரும்பவில்லை. உண்மையில் இந்திய அணியினர் முழு திறமையை வெளிப்படுத்தினர்.

இவ்வாறு அவர் கூறினார்.

ஆஸ்திரேலியா - இந்தியா இடையிலான 2-வது ஒருநாள் கிரிக்கெட் போட்டி அடிலெய்டில் நேற்று நடைபெற்றது. 299 ரன்கள் அடித்தால் வெற்றி என்ற இலக்குடன் இந்திய அணி களம் இறங்கியது. 4-வது விக்கெட்டுக்கு ஜோடி சேர்ந்த விராட் கோலி - டோனி சிறப்பான ஆட்டத்தை வெளிப்படுத்தினர்.

சிறப்பாக விளையாடி சதம் அடித்த விராட் கோலி 112 பந்தில் 104 ரன்கள் சேர்த்து ஆட்டமிழந்தார். அப்போது இந்தியா 43.4 ஓவரில் 4 விக்கெட் இழப்பிற்கு 242 ரன்கள் அடித்திருந்தது. 38 பந்தில் 57 ரன்கள் தேவை என்ற நிலையில் தினேஷ் கார்த்திக் களம் இறங்கினார். அப்போது டோனி 34 பந்தில் 26 ரன்கள் எடுத்திருந்தார்.

தினேஷ் கார்த்திக் அதிரடியாக விளையாடி 14 பந்தில் 25 ரன்கள் சேர்த்தார். டோனி 20 பந்தில் 29 ரன்கள் சேர்த்தார். இதனால் 4 பந்துகள் மீதமுள்ள நிலையில் இந்தியா 6 விக்கெட் வித்தியாசத்தில் வெற்றி பெற்றது.

இந்த வெற்றிக்குப்பின் நிருபர்களை சந்தித்த தினேஷ் கார்த்திக், தன்னை 6-வது இடத்தில் களம் இறக்கி போட்டியை பினிஷ் செய்ய அணி விரும்புகிறது என்று தெரிவித்தார்.

இதுகுறித்து தினேஷ் கார்த்திக் கூறுகையில் ‘‘டோனி இந்தத் தொடரில் சிறப்பாக விளையாடி வருகிறார். அடிலெய்டு இன்னிங்ஸ் போன்று அவர் ஏற்கனவே பலமுறை விளையாடியுள்ளார். ஆகவே. டோனி கடைசி வரை நின்று ஆட்டத்தை முடிப்பதை பார்க்க சிறப்பாக இருந்தது. நெருக்கடியை புரிந்துகொண்டு, சரியான நேரம் வரும்போது எதிரணிக்கு பதிலடி கொடுப்பார் என்பது எங்களுக்குத் தெரியும். இதுதான் எப்போதும் அவருடைய பலம். அடிலெய்டு போட்டி அதற்கு சரியான எடுத்துக்காட்டு.

அவருடைய திட்டம் அவருக்குத் தெரியும். என்னுடைய திட்டம் எனக்குத் தெரியும். ஒருவருக்கொருவர் ஒத்துழைப்பாக இருந்தோம். இன்னும் 10 ஓவர்கள் இருக்கிறது. அதில் எப்படி ரன்கள் அடிப்பது என்று டோனி நினைக்கவில்லை. ஆனால், தற்போது பந்து வீச்சாளர் எப்படி பந்து வீசுகிறார் என்பது குறித்துதான் யோசித்தார்.

கடைசி ஓவரில் ஒரு பந்தை வெற்றிகரமாக தூக்கியடித்தால் போதும் என்று எனக்கும் டோனிக்கும் தெரியும். அதனால் நாங்கள் நெருக்குடிக்குள்ளாகவில்லை. எங்களை ஒரு பந்தை கூட தூக்கி அடிக்க விடக்கூடாது என்ற நெருக்கடி பந்து வீச்சாளருக்குத்தான் இருக்கும். ஒரு தவறு செய்தால், அதை நாங்கள் சிறப்பாக பயன்படுத்திக் கெள்வோம். அப்படித்தான் டோனி முதல் பந்தை சிக்சருக்கு தூக்கினார்.



போட்டியை வெற்றிகரமாக முடிப்பதற்கு நான் பயிற்சி எடுத்து வருகிறேன். அதற்கான திறமை மிக முக்கியமானது. போட்டியை வெற்றிகரமாக முடிப்பதற்கு பொறுமை மிகவும் அவசியம். ஏராளமான அனுபவங்கள் உதவும். கிரிக்கெட் போட்டியில் மிகவும் கடினமான திறமை அது. போட்டியை வெற்றிகரமாக முடிக்கும்போது, அணியின் ஒரு பகுதியாக இருப்பது சிறப்பு.

அணி நிர்வாகம் தற்போது போட்டியை வெற்றிகரமாக முடிப்பதுதான் வேலை என்று என்னிடம் கூறியுள்ளது. என்னால் எவ்வளவு சிறப்பான ஆட்டத்தை வெளிப்படுத்த முடியுமோ அதை அணி விரும்புகிறது. அவர்கள் எனக்கு முழு ஆதரவாக இருக்கிறார்கள். அவர்கள் என்னிடம் என்ன நினைக்கிறார்களோ? அதை என்னால் முடிந்த அளவிற்கு அளிக்க முயற்சி செய்து வருகிறேன்’’ என்றார்.

ஜிம்பாப்வே அணி இதுவரை இந்தியாவில் வந்து இருநாடுகளுக்கு இடையிலான தொடரில் விளையாடியது கிடையாது. முதன்முறையாக ஒரு டெஸ்ட் மற்றும் மூன்று ஒருநாள் கிரிக்கெட் போட்டியில் விளையாடும் வகையில் ஏற்பாடு செய்யப்பட்டிருந்தது.

உலகக்கோப்பை மற்றும் பொதுத்தேர்தலை கருத்தில் கொண்டு ஐபிஎல் தொடர் முன்னதாகவே மார்ச் 23-ந்தேதி தொடங்கப்படுகிறது. இந்தியா ஆஸ்திரேலியா மற்றும் நியூசிலாந்தை தொடரை பிப்ரவரி 10-ந்தேதிதான் முடிக்கிறது.

அதன்பின் ஆஸ்திரேலியாவிற்கு எதிராக பிப்ரவரி 24-ந்தேதி முதல் மார்ச் 13-ந்தேதி வரை ஆஸ்திரேலியாவுடன் இரண்டு டி20 மற்றும் ஐந்து ஒருநாள் போட்டி கொண்ட தொடரில் விளையாடுகிறது. ஆஸ்திரேலியா தொடருக்கும் ஐபிஎல் தொடருக்கும் இடையே 10 நாட்கள்தான் உள்ளதால் இந்தியா - ஜிம்பாப்வே தொடர் நடைபெறுவதில் சிக்கல் ஏற்பட்டுள்ளது. ஒருவேளை டெஸ்ட் போட்டி டி20 போட்டியாக மாறலாம் அல்லது தொடர் தள்ளிப்போகலாம் என எதிர்பார்க்கப்படுகிறது.